శ్రీవారి సేవకుల పేరుతో శాశ్వత ఉద్యోగాలకు ఎసరు పెట్టొద్దు

తిరుమలలో భక్తులకు నిరంతరం సేవలందిస్తున్న టీటీడీ శాశ్వత ఉద్యోగులను తగ్గించి, ఆ పనులను శ్రీవారి సేవకులతో చేయించుకోవాలని ముఖ్యమంత్రి చేసిన వ్యాఖ్యలు తీవ్ర అభ్యంతరకరమని మురళి పేర్కొన్నారు. టీటీడీ ఉద్యోగులను తక్కువ చేసి మాట్లాడటం వారి మనోభావాలను గాయపరచడమేనని ఆయన మండిపడ్డారు. ఈ మేరకు ఆయన ఒక ప్రకటనలో ప్రభుత్వ వైఖరిని తప్పుబట్టారు.
శ్రీవారి సేవకులు స్వచ్ఛందంగా అందిస్తున్న సేవలను తాము పూర్తిగా గౌరవిస్తామని, అయితే వారిని శాశ్వత ఉద్యోగులకు ప్రత్యామ్నాయంగా చూపడం ఏమాత్రం సరికాదని మురళి హితవు పలికారు. పారిశుద్ధ్యంతో సహా తిరుమలలో ప్రతిరోజూ నిర్వహించాల్సిన అనేక కీలక పనులకు తగిన సంఖ్యలో శాశ్వత ఉద్యోగులు, కార్మికులు అవసరమని స్పష్టం చేశారు. ఉద్యోగులు, కాంట్రాక్ట్ కార్మికులు, శ్రీవారి సేవకుల మధ్య పోటీ పెట్టే విధానాన్ని ప్రభుత్వం తక్షణమే విడనాడాలని డిమాండ్ చేశారు.

బడ్జెట్ లెక్కల్లో వాస్తవాలివీ..

టీటీడీ ఆదాయంలో 50 శాతానికి పైగా ఉద్యోగుల జీతాలకే ఖర్చవుతోందన్న వాదనను మురళి తీవ్రంగా ఖండించారు. 2025-26 టీటీడీ వార్షిక బడ్జెట్ రూ.5,258.68 కోట్లు కాగా.. అందులో జీతాలు, ఇతర సిబ్బంది చెల్లింపులకు కేటాయించింది రూ.1,773.75 కోట్లు (సుమారు 34 శాతం) మాత్రమేనని గుర్తుచేశారు. ఈ కేటాయింపుల్లో కేవలం రెగ్యులర్ ఉద్యోగులే కాకుండా, కాంట్రాక్టు, ఔట్ సోర్సింగ్ సిబ్బంది చెల్లింపులు కూడా ఉన్నాయని, వాటన్నింటినీ సాధారణ ఉద్యోగుల జీతాలుగా చూపడం విడ్డూరమన్నారు. కాంట్రాక్ట్ కార్మికులు ఎదుర్కొంటున్న పనిభారాన్ని, వారికి అందుతున్న పరిమిత వేతనాలను కూడా ప్రభుత్వం పరిగణనలోకి తీసుకోవాలని కోరారు.

సత్యసాయి ట్రస్టుతో పోలిక సరికాదు..

సత్యసాయి ట్రస్ట్ సేవా విధానాన్ని ప్రస్తావిస్తూ తిరుమలలోనూ అదే తరహాలో పనులు నిర్వహించాలని సూచించడం క్షేత్రస్థాయి వాస్తవాలకు విరుద్ధమన్నారు. రెండు సంస్థలకు వచ్చే భక్తుల సంఖ్యలో ఉన్న భారీ వ్యత్యాసాన్ని ప్రభుత్వం గుర్తించాలన్నారు. గతంతో పోలిస్తే తిరుమలకు వచ్చే భక్తుల రద్దీ, నిర్వహించాల్సిన సేవలు గణనీయంగా పెరిగాయని, దానికి అనుగుణంగా సిబ్బందిని నియమించకుండా ఉన్న ఉద్యోగుల పనితీరును తప్పుపట్టడం అన్యాయమన్నారు.
ముఖ్యమంత్రి వెంటనే తన వ్యాఖ్యలను ఉపసంహరించుకొని, టీటీడీ ఉద్యోగుల మనోభావాలను గౌరవించేలా సరైన వివరణ ఇవ్వాలని మురళి డిమాండ్ చేశారు. తిరుమలలో నిరంతరం అవసరమయ్యే పనులకు తక్షణమే శాశ్వత నియామకాలు చేపట్టాలని, కాంట్రాక్ట్ కార్మికులకు న్యాయమైన వేతనాలతో పాటు ఉద్యోగ భద్రత కల్పించాలని ప్రభుత్వాన్ని కోరారు.