తెరపై హీరోయిన్.. తెరవెనుక బ్రోకర్!

న్యూస్ డెస్క్: వెండితెరపై, ఓటీటీల్లో నటించి ప్రేక్షకులను అలరించిన ఓ నటి.. తెరవెనుక వ్యభిచార దందా నడుపుతూ పోలీసులకు చిక్కిన ఘటన మహారాష్ట్రలోని థానేలో తీవ్ర కలకలం రేపుతోంది. పక్కా సమాచారంతో వ్యూహాత్మకంగా వ్యవహరించిన పోలీసులు ఈ ముఠా గుట్టు రట్టు చేశారు. వ్యభిచార కూపం నిర్వహిస్తున్న నటిని అరెస్ట్ చేసి, ఇద్దరు బాధితులను సురక్షితంగా రక్షించారు.

థానే పరిధిలోని వాగ్లే ఎస్టేట్‌లో ఉన్న ఓ బార్ అండ్ రెస్టారెంట్ కేంద్రంగా వ్యభిచార కార్యకలాపాలు సాగుతున్నట్లు పోలీసులకు పక్కా సమాచారం అందింది. దీంతో రంగంలోకి దిగిన అధికారులు.. ఓ డెకాయ్ (నకిలీ) కస్టమర్‌ను ఆ రెస్టారెంట్‌కు పంపించారు. బేరం కుదిరిన వెంటనే నకిలీ కస్టమర్ ఇచ్చిన సిగ్నల్‌తో పోలీసులు ఆకస్మిక దాడి చేశారు. వ్యభిచార గృహాన్ని నడుపుతున్న నటిని రెడ్ హ్యాండెడ్‌గా అదుపులోకి తీసుకుని, అక్కడ నిర్బంధంలో ఉన్న ఇద్దరు మహిళలకు విముక్తి కల్పించారు.

రూ.25 వేల వసూలు.. నటి కమీషన్ రూ.15 వేలు!

అరెస్టయిన నిందితురాలు సాధారణ మహిళ కాదని, గతంలో సుమారు 10 హిందీ వెబ్ సిరీస్‌లు, 3 భోజ్‌పురి సినిమాల్లో హీరోయిన్‌గా, కీలక పాత్రల్లో నటించినట్లు పోలీసుల విచారణలో వెల్లడైంది. ఒక్కో కస్టమర్ నుంచి రూ.25 వేలు వసూలు చేస్తూ.. అందులో బాధితులకు కేవలం రూ.10 వేలు ఇచ్చి, మిగతా రూ.15 వేలు తానె తీసుకుంటున్నట్లు ప్రాథమిక విచారణలో నటి అంగీకరించింది. గ్లామర్ ప్రపంచంలో అవకాశాలు తగ్గిపోవడంతో, సులభంగా డబ్బు సంపాదించాలనే దురాశతోనే ఆమె ఈ దారి ఎంచుకున్నట్లు తెలుస్తోంది.

ఈ ఘటనపై థానేలోని శ్రీనగర్ పోలీస్ స్టేషన్‌లో కేసు నమోదు చేసినట్లు అధికారులు తెలిపారు. ఈ దందా వెనుక ఇంకెవరెవరు ఉన్నారు? వెనుక ఏదైనా భారీ నెట్‌వర్క్ ఉందా? అన్న కోణంలో పోలీసులు విచారణ ముమ్మరం చేశారు. నిందితురాలి కాల్ డేటా, బ్యాంక్ లావాదేవీలు, సోషల్ మీడియా పరిచయాలను జల్లెడ పడుతున్నారు. రక్షించబడిన ఇద్దరు మహిళలను సైతం విచారించి, వారు ఈ కూపంలోకి ఎలా వచ్చారనే వివరాలు సేకరిస్తున్నారు. డబ్బు వ్యామోహంతో నటి అడ్డదారి తొక్కడం ప్రస్తుతం స్థానికంగా తీవ్ర చర్చనీయాంశమైంది.