అక్టోబర్ నుంచి 1.58 కోట్ల రేషన్ కార్డుల నిలిపివేత.. ఈ-కేవైసీకి మూడు నెలల గడువు

ప్రజా పంపిణీ వ్యవస్థలో పారదర్శకత తీసుకురావడమే లక్ష్యంగా ప్రభుత్వం కీలక నిర్ణయం తీసుకుంది. ఆరు నెలలుగా రేషన్ సరుకులు తీసుకోని సుమారు 1.58 కోట్ల మంది లబ్ధిదారుల రేషన్ కార్డులను అక్టోబర్ నెల నుంచి తాత్కాలికంగా నిలిపివేసేందుకు సిద్ధమైంది. నకిలీ, డూప్లికేట్ కార్డులతో పాటు మరణించిన వ్యక్తుల పేర్లను తొలగించి, నిజమైన నిరుపేదలకు ప్రభుత్వ సాయం అందాలన్నదే ఈ నిర్ణయం వెనుక ఉన్న ప్రధాన ఉద్దేశం. ఇప్పటికే ఆధార్ అనుసంధానం, డిజిటలైజేషన్, ఈ-కేవైసీ వంటి విధానాల ద్వారా పీడీఎస్ (PDS) డేటాబేస్‌ను ప్రక్షాళన చేసే పనిని ప్రభుత్వం ముమ్మరం చేసింది.

అయితే, లబ్ధిదారుల పేర్లను ప్రభుత్వం డేటాబేస్ నుంచి వెంటనే శాశ్వతంగా తొలగించదు. వారు నిజమైన లబ్ధిదారులని నిరూపించుకోవడానికి వీలుగా మూడు నెలల గడువు ఇవ్వనుంది. ముందుగా కార్డులను తాత్కాలికంగా మాత్రమే నిలిపివేస్తారు. ఈ మూడు నెలల వ్యవధిలోగా సంబంధిత లబ్ధిదారులు ఈ-కేవైసీ ప్రక్రియను పూర్తి చేస్తే, వారి రేషన్ కార్డులను తిరిగి యాక్టివేట్ చేస్తారు. వరుసగా ఆరు నెలల పాటు రేషన్ తీసుకోకపోవడానికి అనేక కారణాలు ఉండే అవకాశం ఉన్నందున, ఏ కార్డునూ ఒకేసారి రద్దు చేయకుండా ముందుగా ధ్రువీకరణకు అవకాశం కల్పిస్తున్నారు. ఈ ప్రక్రియ పూర్తయితే రేషన్ బియ్యం పక్కదారి పట్టకుండా నిరోధించవచ్చని అధికారులు భావిస్తున్నారు.

మరోవైపు ప్రభుత్వ తాజా నిర్ణయంపై కొందరు నిపుణులు ఆందోళన వ్యక్తం చేస్తున్నారు. అజీమ్ ప్రేమ్‌జీ యూనివర్సిటీకి చెందిన ప్రొఫెసర్ రాజేంద్రన్ నారాయణన్ ఈ అంశంపై స్పందిస్తూ.. లబ్ధిదారులు రేషన్ తీసుకోకపోవడానికి గల అసలు కారణాలను క్షేత్రస్థాయిలో విచారించకుండా కార్డులను నిలిపివేస్తే, నిజమైన పేదలు తీవ్రంగా నష్టపోయే ప్రమాదం ఉందన్నారు. సాంకేతిక లోపాలు, బతుకుదెరువు కోసం వలస వెళ్లడం లేదా రేషన్ డీలర్లతో తలెత్తే ఇబ్బందుల వల్ల కూడా చాలామంది సరుకులు తీసుకోలేకపోవచ్చని ఆయన గుర్తుచేశారు. ఏది ఏమైనప్పటికీ రేషన్ వ్యవస్థ ప్రక్షాళన ఎంత అవసరమో, అదే సమయంలో సాంకేతిక కారణాల వల్ల ఏ ఒక్క నిరుపేద కూడా అన్నానికి దూరం కాకుండా జాగ్రత్తలు తీసుకోవడం కూడా అంతే ముఖ్యం. లబ్ధిదారుల వాస్తవ పరిస్థితిని పరిగణనలోకి తీసుకుని ఈ-కేవైసీ ప్రక్రియను ముందుకు తీసుకెళ్లాలని పలువురు సూచిస్తున్నారు.