ఈసీఐఎల్‌లో 'హిట్ అండ్ రన్'.. 10 మందిపైకి దూసుకెళ్లిన కారు

ఈసీఐఎల్ (హైదరాబాద్): నగరంలోని ఈసీఐఎల్ పోలీస్ స్టేషన్ పరిధిలో దారుణం చోటుచేసుకుంది. అర్ధరాత్రి రోడ్డు పక్కన నడుచుకుంటూ వెళ్తున్న పాదచారులపై ఓ కారు డ్రైవర్ మృత్యువులా విరుచుకుపడ్డాడు. అత్యంత వేగంగా, నిర్లక్ష్యంగా కారును నడిపి ఏకంగా పది మందిని ఢీకొట్టాడు. ప్రమాదం జరిగిన వెంటనే కారును ఆపకుండా అక్కడినుంచి పరారయ్యాడు. ఈ 'హిట్ అండ్ రన్' ఘటన స్థానికంగా తీవ్ర కలకలం రేపింది.

పోలీసులు తెలిపిన వివరాల ప్రకారం.. బీహార్ రాష్ట్రానికి చెందిన పది మంది కార్మికులు నిన్న అర్ధరాత్రి సమయంలో రోడ్డు పక్కన నడుచుకుంటూ వెళ్తున్నారు. అదే సమయంలో వెనుక నుంచి వేగంగా వచ్చిన ఓ గుర్తుతెలియని కారు అదుపుతప్పి వారిపైకి దూసుకెళ్లింది. కారు బలంగా ఢీకొట్టడంతో పది మంది చెల్లాచెదురుగా పడిపోయారు. ఈ ప్రమాదంలో ముగ్గురికి తీవ్ర గాయాలు కాగా, మిగిలిన ఏడుగురు స్వల్ప గాయాలతో బయటపడ్డారు. ప్రమాదం జరిగిన తర్వాత డ్రైవర్ ఏమాత్రం కనికరం లేకుండా వాహనాన్ని ఆపకుండా వేగంగా పరారయ్యాడు. కారు పాదచారులను ఢీకొట్టిన ఒళ్లు జలదరించే దృశ్యాలు సమీపంలోని సీసీటీవీ కెమెరాల్లో రికార్డయ్యాయి.

ప్రమాదంపై సమాచారం అందుకున్న వెంటనే పోలీసులు హుటాహుటిన ఘటనా స్థలానికి చేరుకున్నారు. క్షతగాత్రులను చికిత్స నిమిత్తం వెంటనే సమీపంలోని ఆసుపత్రికి తరలించారు. ఈ ఘటనపై కేసు నమోదు చేసుకున్న పోలీసులు.. సీసీటీవీ ఫుటేజీల ఆధారంగా పరారైన కారు, డ్రైవర్‌ను గుర్తించేందుకు దర్యాప్తు ముమ్మరం చేశారు.