రష్యాతో అనుబంధం చారిత్రాత్మకం: విదేశాంగ మంత్రి ఎస్. జైశంకర్ స్పష్టీకరణ

న్యూఢిల్లీ: భారత్, రష్యాల మధ్య సంబంధాలు చారిత్రక అనుభవాల పునాదులపై నిర్మితమయ్యాయని విదేశాంగ మంత్రి ఎస్. జైశంకర్ అన్నారు. న్యూఢిల్లీలో జరిగిన Munich Security Conference వేదికగా ఆయన మాట్లాడుతూ, చరిత్ర మంచిదైనా.. చెడుదైనా ప్రజలు ఎప్పటికీ మరిచిపోరని తెలిపారు. మాస్కోతో న్యూఢిల్లీ కొనసాగిస్తున్న ద్వైపాక్షిక సంబంధాలపై ప్రశ్నలు లేవనెత్తుతున్న పాశ్చాత్య దేశాలకు ఆయన తనదైన శైలిలో సమాధానమిచ్చారు.

1950ల కాలం నుంచే సోవియట్ యూనియన్ (రష్యా) భారత్‌కు నిలకడైన మద్దతు అందించిందని జైశంకర్ గుర్తుచేశారు. ప్రపంచంలోని పలు దేశాలు పాకిస్థాన్ సైనిక పాలనకు మద్దతుగా నిలిచిన సమయంలో రష్యా భారత్‌కు అండగా నిలిచిందన్నారు. ముఖ్యంగా 1971 భారత్-పాక్ యుద్ధ సమయంలో అమెరికా ఇస్లామాబాద్‌కు మద్దతుగా బంగాళాఖాతంలోకి నౌకాదళ టాస్క్‌ఫోర్స్‌ను పంపిన విషయాన్ని ప్రస్తావిస్తూ, ఆ క్లిష్ట సమయంలో మాస్కో అందించిన సహాయం ఎనలేనిదని వివరించారు.

స్వతంత్ర విదేశాంగ విధానానికే భారత్ కట్టుబాటు:

రష్యాను యూరప్ చూసే దృక్కోణాన్ని భారత్ కూడా యథాతథంగా అనుసరించాలని ఆశించడం సరైంది కాదని మంత్రి స్పష్టం చేశారు. ప్రతి దేశం తన సొంత అనుభవాల ఆధారంగానే ఇతర దేశాలతో సంబంధాలను అంచనా వేస్తుందన్నారు. రష్యాతో భారత్ అనుభవం ఎల్లప్పుడూ సానుకూలంగానే ఉందని, ద్వైపాక్షిక సంబంధాలు తమ సొంత చరిత్ర ఆధారంగానే ముందుకు సాగుతాయని తేల్చిచెప్పారు.
అన్ని రంగాల్లోనూ విస్తరించిన India-Russia Partnership:
1970, 1980ల కాలం నుంచి ఇరుదేశాల భాగస్వామ్యం మరింత విస్తరించిందని జైశంకర్ చెప్పారు. కేవలం రక్షణ, అణు సహకారానికే పరిమితం కాకుండా.. ద్వైపాక్షిక వాణిజ్యం, ఇంధన భద్రత (Energy Security), సహజ వనరుల వినియోగం వంటి కీలక రంగాల్లో ఇరుదేశాల బంధం బలమైన పునాదులపై నిలిచిందని పునరుద్ఘాటించారు.